La poesia del lunedì. Orsolina Pace Mazzarese.

Pani di casa di quann’era nica

ca me’ nanna facia cu tantu amuri,

cu la farina bianca di la spica!

Chi profumu ch’avia ‘ddu pani friscu

appena di lu furnu si niscia!

di farina sincera, senza ammiscu!

Ora c’è pani, ringraziannu a Diu,

in ogni furnu, e pari mufulettu,

ma di sustanza picca cci nni viu.

Pani e cipudda!.. E cci pruvavi gustu,

puru si lu manciavi duru e schittu,

comu si fussi ‘na fedda d’arrustu!

Lu pani, è veru, sempri pani è!

Sia biancu o scuru, sia comu si voli.

E ringraziamu a Diu quannu cci nn’è!..

Però… Unn’è ‘ddu pani di paisi,

ca tantu mi piacia quann’era nica,

sinceru… comu nesci di la spica?