L'ode oraziana per la morte di Cleopatra nel mio dialetto

Moneta di Cleopatra

Ora putiemmu viviri e abballari

senza pinsera e addrumari cannili

a tutti li putenzi di lu celu.

Vinni l'otta, cumpagni.

Primu nun si putiva mancu ràpiri

lu vuttacciuolu di lu vinu viecchiu

ch’era sarbatu ‘nni la cantineddra.

Ora si po' scialari.

Nun si putiva quannu la rigina,

ccu ddri mpistati ca purtava appriessu,

foddri vulìa abbissari Campidogliu,

suttamintiri Roma.

S’avìa ‘mbriacatu di bona furtuna

e ci parìa lu munnu tuttu chianu;

ma di tutti li navi ch’iddra avìa,

si la scansà una sula,

ca tutti l’atri distrudì la vampa

e ci fici capiri a la spustata,

ch’era futtuta ‘ntesta pi lu vinu,

chiddru c’avìa a capiri.

L’assicutava di l’Italia Cesari,

cu tutti li so navi com’un ticciu

c'assicuta un palummu o un cacciaturi

ca va appriessu a lu liebbru.

Cesari lu vuliva ncatinari

stu castigu di ddìu, ma la rigina

nun si scantava mancu di la spata

e morsi comu n’omu.

La vosi la so morti e nun circaiu

un pirtusu, na cala ammucciateddra,

d'unna fujrisinni cu la varca.

Ma senza tuculiari

taliavia lu palazzu ca s'abbissa

e nun si spagnava di maniari

lu schirsunieddu ca la muzicà

di niuru vilenu.

Morsi superba e nun ci vosi dari

lasu a Cesari di purtarisilla

ncatinata ppi sfreggiu strati strati,

iddra ch’era rigina. 

Riveduta e corretta.